AIFAESA, I.P. · Kódigu Konduta

Nota Introdutória

AIFAESA, nu'udar autoridade responsavel ba inspesaun no fiskalizasaun atividade ekonómika, sanitária no alimentár, iha devér atu atua ho padraun étiku no profisional ás. Kódigu Konduta ida ne'e estabelese prinsípiu no norma sira ne'ebé tenke orienta konduta funsionáriu hotu-hotu iha sira-nia knaar.

Kódigu Konduta ne'e sai mós instrumentu fundamental atu promove integridade, profisionalizmu no efisiénsia iha servisu públiku ne'ebé AIFAESA fornese, kontribui ba konstrusaun kultura organizasional ida ne'ebé bazeia ba valór sólidu no prátika profisional di'ak.

Dokumentu ida ne'e aborda de'it aspetu jerál konduta no komportamentu profisional. Prosedimentu tékniku espesífiku, protokolu operasional no metodolojia servisu divizaun ka departamentu ida-idak nian sei detalha iha Standard Operations Manual (SOP) ida-idak nian.

Komprensaun no aplikasaun Kódigu ida ne'e, hamutuk ho manuál operasional espesífiku sira, sei permite funsionáriu ida-idak kontribui ba kumpre misaun institusional AIFAESA nian ho exselénsia no dignidade.

Díli, 18 Fevereiru 2025 Dra. Odete da Silva Viegas Dermatologista · Inspetora-Jeral AIFAESA, I.P.

Capítulo 1

Prinsípiu Fundamental sira

1.1 Legalidade no Autoridade

Hala'o knaar tuir lei
Uza podér autoridade ho forma adekuada no proporsional
Mantén dignidade no prestíjiu instituisaun nian iha situasaun hotu-hotu

1.2 Imparsialidade

Atua ho forma objetiva no izenta
Evita forma diskriminasaun saida de'it
Trata sidadaun no ajente ekonómiku hotu-hotu ho maneira ekitativa

1.3 Integridade

La simu benefísiu ka vantajen saida de'it husi servisu ne'ebé halo nudar funsionáriu ka ofisial AIFAESA
Evita situasaun ne'ebé bele kria konflitu interese
Mantén segredu ka sijilu profisional konabá informasaun konfidensial sira

Capítulo 2

Konduta iha Ambiente Servisu

2.1 Asiduidade no Pontualidade

Kumpre oras servisu ne'ebé estabelese ona
Fó hatene uluk ba superior imediatu bainhira atu tama tarde
Husu autorizasaun diretamente ba superior imediatu kuandu presiza sai hosi fatin servisu ba tempu liu oras ida
Rejista movimentasaun tama-sai servisu fatin tuir prosedimentu internu

2.2 Relasaun Interna

Promove ambiente servisu kolaborativu no armoniuzu
Respeita ierarkia no kompeténsia
Fahe matenek no experiénsia
Mantén komunikasaun profisional no respeituoza
Evita komportamentu ne'ebé bele inkomoda kolega sira

2.3

Prevensaun Asédiu Seksuál

⚠️

Toleránsia zero. Asédiu seksuál sei hetan kastigu tuir gravidade. Kazu grave sei refere ba autoridade polísia. La iha toleránsia ba retaliasaun hasoru denunsiante.

2.3.1 Definisaun

Hahalok seksuál indezejadu ne'ebé kria ambiente servisu intimidativu ka ofensivu
Pedidu favór seksuál ka atensaun seksuál indezejadu
Komentáriu seksuál ka insinuasaun ne'ebé la apropriadu
Konduta fízika la apropriada — kaer, kose ka hakbesik-an demais
Fahe materiál seksuál la apropriadu (imajen, vídeo, mensajen)

2.3.2 Prevensaun no Protesaun

Eduka funsionáriu sira kona-ba asédiu seksuál no ninia konsekuénsia
Estabelese prosesu klaru atu relata kazu asédiu seksuál
Garante konfidensialidade ba vítima no denunsiante
Proteje vítima no denunsiante kontra retaliasaun
Halo investigasaun independente no neutral ba keixa hotu-hotu

2.3.3 Responsabilidade Funsionáriu

Mantén konduta respeitoza ho kolega sira
Evita hahalok ne'ebé bele sai asédiu seksuál
Relata kazu asédiu seksuál ba autoridade kompetente
Kontribui ba ambiente servisu seguru no respeitozu
Apoia kolega sira ne'ebé sofre asédiu seksuál

2.3.4 Prosedimentu Relata Kazu

Relata kazu ba xefe departamentu ka diretór rekursu umanu
Hakerek relatu detalladu kona-ba insidente
Fornese evidénsia disponivel (mensajen, testemuña, dokumentu)
Mantén konfidensialidade durante prosesu tomak
Kolabora ho investigasaun bainhira husu

2.3.5 Medida Disiplinár

Asédiu seksuál sei hetan kastigu tuir gravidade
Kastigu bele inklui adverténsia to'o demisaun
Kazu grave sei refere ba autoridade polísia
La iha toleránsia ba retaliasaun hasoru denunsiante
Dokumenta kazu hotu-hotu ho detalle

2.3.6

Relasaun Pesoál iha Ambiente Servisu

2.3.6.1 Relasaun Romántika entre Funsionáriu

La bele hahú ka mantén relasaun romántika ho kolega ne'ebé iha relasaun ierarkika direta (xefe-subordinadu)
Tenke fó-hatene ba departamentu rekursu umanus kona-ba relasaun romántika entre funsionáriu sira iha departamentu hanesan
Evita demonstrasaun afetu públika iha ambiente servisu
Mantén relasaun profisional durante oras servisu
La bele husik relasaun pesoál afeta dezempeñu profisional

2.3.6.2 Prevensaun Relasaun Extra-Marital

La permite relasaun extra-marital entre funsionáriu sira tanba:

Kria ambiente servisu la saudável
Hamosu konflitu entre kolega sira
Afeta produtividade no moral funsionáriu sira nian
Prejudika imajen instituisaun nian

Violasaun bele rezulta iha:

Transferénsia ba departamentu seluk
Medida dixiplinár tuir gravidade
Posibilidade demisaun iha kazu grave

2.3.6.3 Jestaun Kazu Feen-Laen

Evita kolokasaun fén-laen iha departamentu ka seksaun hanesan
Departamentu rekursu umanus sei jere transferénsia apropriadu
Funsionáriu foun ne'ebé kaben ho funsionáriu atuál tenke informa ba rekursu umanus antes hahú servisu

Bainhira fén-laen servisu iha AIFAESA:

La bele iha relasaun ierarkika direta
Tenke servisu iha departamentu ka área separadu
Labele envolve iha desizaun ne'ebé afeta malu

2.3.6.4 Responsabilidade Jestaun

Xefe departamentu sira tenke:

Monitoriza ambiente servisu
Prevene situasaun ne'ebé bele hamosu konflitu
Fó-hatene kedas kazu vivasaun ba rekursu umanus
Implementa transferénsia bainhira nesesáriu
Garante tratamentu justu ba funsionáriu hotu-hotu

2.4

Kódigu Vestuáriu no Apresentasaun Pesoál

2.4.1 Vestuáriu ba Servisu Loroloron

Uza roupa formal no profisional
Mane sira: kamiza manga naruk ka badak ho gola, no kalsa formal
Feto sira: vestidu formal, kalsa formal ka saia ho kamiza/blusa apropriada. Saia labele badak liu ain tnur
Sapatu taka metin — la bele uza sandalias
Mantén roupa mós no kabér
Sempre uza Kartaun Identidade servisu nian
La bele uza roupa ho kór rebo-rebo ka dezeñu ne'ebé la apropriadu
Mantén ijiene pesoál di'ak

2.4.2 Vestuáriu ba Servisu Inspesaun no Fiskalizasaun

Uza uniforme ofisiál AIFAESA nian bainhira halo inspesaun
Tenke uza sapatu seguransa apropriadu ba área servisu nian
Sempre lori kartaun identifikasaun funsionáriu
Mantén uniforme iha kondisaun di'ak no hamoos
Uza ekipamentu protesaun pesoál (EPP) bainhira presiza

2.4.3 Regra Jerál Komportamentu

La bele fuma (sigarru normal ou eletróniku) iha edifísiu laran — só bele iha área li'ur ne'ebé determinadu
Kontrola lian atu la koalia makaas iha korredór
Mantén organizasaun no limpeza fatin servisu nian
Respeita espasu kolega sira nian

2.5 Eventu no Konfraternizasaun

Mantén konduta respeituoza no profisional iha eventu institusional
Apresenta-an ho forma adekuada iha jantár, baile no atividade sosiál seluk
Kontrola konsumu bebida alkoólika iha eventu institusional
Preserva imajen instituisaun nian maski iha momentu relaxamentu
Evita komportamentu exesivu ka la adekuadu iha konfraternizasaun

2.6

Uzu Rekursu no Instalasaun

2.6.1 Jestaun Rekursu Partilladu — Prinsípiu Jerál

Komputadór desktop ne'ebé aloka ba seksaun ka departamentu ida maka rekursu kompartilladu, laós ba ema ida de'it
Funsionáriu sira hotu iha seksaun ne'e tenke iha livre asesu ba komputadór ne'e atu bele halo servisu
Respeita oráriu uzu komputadór partilladu nian
Mantén komputadór hamoos no organizadu ba kolega tuirmai

2.6.1.2 Asesu no Seguransa

Metodu partilla username ho password ida de'it ba funsionáriu sira hotu iha seksaun ne'e, OU loke konta (user account) ba funsionáriu ida-idak
La bele instala programa foun sein autorizasaun
Taka sesaun (log out) bainhira la uza ona komputadór
Fó-hatene kedas problema tékniku ruma ba departamentu IT

2.6.1.3 Organizasaun Dokumentu

Xefe seksaun ka departamentu mak sei determina oinsa organiza pastas iha komputadór nia laran atu garante kontinuidade servisu
Salva dokumentu iha pasta ida-idak nian, la bele iha desktop
La bele rai dokumentu servisu iha USB privadu
Tenke iha kopia iha hardrive no, di'ak liu tan, tenke uza cloud storage atu garante seguransa no disponibilidade arkivu sira
Só Inspetora-Jerál mak iha kompeténsia atu determina arkivu ida konfidensial ka lae

2.6.2 Jestaun Tablet no Laptop Institusionál

Tablet no laptop institusionál aloka atu:

Fasilita servisu inspesaun iha terrenu
Permite asesu ba sistema dixitál AIFAESA nian iha fatin hotu-hotu
Hadia efisiénsia rejistu no prosesamentu dadus
Permite kontinuidade servisu bainhira la iha iha eskritóriu

Funsionáriu ne'ebé simu ekipamentu tenke:

Asina termu responsabilidade
Mantén ekipamentu iha kondisaun di'ak
Uza de'it ba fins profisionál
La bele empresta ba ema seluk
Relata kedas problema tékniku ruma
Responsabiliza ba danu ka estragu ruma neebe akontese laptop ba tablet neebé nia kaer

2.6.3 Maximizasaun Utilidade

Instala aplikativu relevante ba servisu
Mantén sistema no aplikasaun sira atualizadu
Uza cloud storage ba sinkronizasaun automatika
Halo backup regulár ba dadus importante
Utiliza feature sira ne'ebé bele hadia produtividade

2.6.4 Seguransa no Protesaun

Ativa PIN ka password seguru
Ativa enkriptasaun ba dadus sensivel
La bele husik ekipamentu la supervizionadu
Instala antivirus institusionál
Evita liga ba rede públika inseguru

2.6.5 Kuidadu ho Mobiliariu no Ekipamentu

Kuidadu di'ak ho meza no kadeira servisu nian
La bele dada ka dudu mobiliariu makaas
Mantén kadeira iha pozisaun loos bainhira remata servisu
Hamoos meza no ekipamentu antes sai
La bele modifika ka hasai pesa ruma hosi ekipamentu
Fó-hatene kedas bainhira iha estragu ruma ba mobiliariu

2.6.6 Jestaun Área Komún

Tau matan ba patrimóniu instituisaun nian
Uza rekursu material ho responsabilidade
Mantén área komún hamoos no organizadu
Respeita norma utilizasaun espasu komún nian
Fó-hatene kedas bainhira iha estragu ruma ba patrimóniu

Capítulo 3

Relasaun Externa

3.1 Komunikasaun Externa

Tuir protokolu komunikasaun institusional
Haruka pedidu média nian ba responsavel sira
Preserva imajen institusional
Mantén diskrisaun kona-ba atividade internu sira

3.2

Komunikasaun Institusional

3.2.1 Uzu Email Institusional

📧

Tenke uza de'it email institusional @aifaesa.gov.tl ba komunikasaun hotu-hotu relasiona ho servisu.

La bele uza email pesoál ba asuntu ofisiál
Mantén linguajen formal no profisional iha komunikasaun hotu-hotu
Inklui asinatura institusional padronizada iha email
Responde komunikasaun ofisiál iha tempu útil
Evita haruka informasaun konfidensial liu hosi email
Arkiva ho di'ak komunikasaun ofisiál sira
Haruka ba xefe ierarkia informasaun ne'ebé liu ita-nia kompeténsia
La bele fó sai email institusional ba fin pesoál
Mantén konfidensialidade komunikasaun internu nian

3.2.2 Sistema Intranet AIFAESA

🌐

Rejista-an nudar uzuáriu iha intranet.aifaesa.org no kompleta kampu sira iha área funsionáriu nian.

Kompleta: Dadus Pesoais, formasaun akadémika, Karreia no treinamentu sira
Uza foto perfil tuir deskrisaun: pozisaun hateke ba oin, distânsia 3mm husi marjen leten, oin okupa 70–80%, medida 35mm×45mm
Labele fahe username ho password ba kolega seluk
Uza sistema Mensajens iha intranet ba komunikasaun kona-ba asuntu servisu
Prefere sistema Mensajens duké email ka meiu seluk ba komunikasaun internu
La bele apaga mensajen ofisiál sira
Mantén linguajen formal no profisional iha mensajen hotu-hotu

3.2.3 Jestaun Tarefas no Atividade

Verifika beibeik seksaun Tarefas iha intranet
Atualiza progresu tarefas nian regulármente
Rejista atividade loroloron iha seksaun Atividades
Tenke kompleta rejistu atividade ho detalle sufisiente
Rejistu sai baze ba avaliasaun dezempeñu
Asegura informasaun lós no atuál

3.2.4 Importánsia Rejistu Atividade

Rejistu regulár kontribui ba avaliasaun objetiva
Dokumentasaun sai evidénsia ba dezempeñu
Garante transparénsia iha prosesu avaliasaun
Fasilita monitorizasaun no supervizaun
Ajuda estabelese meta no objetivu sira
Fornese baze ba avaliasaun justu no transparente

3.3 Relasionamentu ho Instituisaun seluk

Mantén kooperasaun ho órgaun públiku seluk
Respeita kompeténsia instituisaun seluk nian
Mantén profisionalizmu iha relasaun interinstitusional

3.4 Relasionamentu ho Públiku ein jeral

Fornese informasaun ho maneira klara no kortés
Atende ho edukasaun no efisiénsia
Mantén postura profisional iha interasaun hotu-hotu

Capítulo 4

Kumprimentu Kódigu nian

Konsiderasaun Final

Kódigu Konduta ida ne'e maka matadalan prátiku ida atu orienta komportamentu profisional funsionáriu AIFAESA sira nian. Tenke konsulta regularmente no tuir ninia matadalan hamutuk ho norma no regulamentu seluk instituisaun nian.

Aplikasaun Kódigu ida ne'e kontribui ba mantén ambiente servisu armoniuzu no profisional, ne'ebé esensiál atu kumpre misaun institusional AIFAESA nian.